आपल्या कथेमधून वेगवेगळे नाविन्य दाखवत मराठी सिनेमाने नेहमीच आपले स्थान उंचावत ठेवलेय, चित्रपटांचे शीर्षक (टाईटल) सुद्धा नेहमीच हटके असल्याचे पाहायला मिळते. शुबीर मुखर्जी प्रस्तुत क्षितीज मोशन पिक्चर्स निर्मित ‘लोच्या ऑनलाईन’ ह्या असाच एक हटके शीर्षक असलेल्या सिनेमाचा मुहूर्त नुकताच अंधेरीच्या एल.एम स्टुडियोत एका भन्नाट गाण्याच्या ध्वनिमुद्रनाने झाला. रुपेश सोनार निर्मित ‘लोच्या ऑनलाईन’ ची कथा-पटकथा-दिग्दर्शन रमेश चव्हाण यांचे असून सवांद शरद जोशी यांचे आहेत तर छायाचित्रणा अरविंद पुवार ह्यांचे असणार आहे.

तंत्रज्ञानाचे अनेक फायदे असले तरी त्याच्या अतिरेकामुळे हानी सुद्धा होऊ शकते. तरुण पिढी या सतत ऑनलाईनच्या जंजाळात अनेक मोहांना बळी पडते, या आभासी दुनियेत स्वत:ला हरवून बसते.  नव्या पिढीच्यारोजच्या जगण्यात माहिती तंत्रज्ञानाच्या चुकीच्या वापरामुळे निर्माण होणार्या समस्यांची जाणींव एका उत्कंठावर्धक कथेच्या माध्यमातून या चित्रपटात मांडण्यात आली आहे.

नुकत्याच ध्वनिमुद्रित झालेल्या गाण्या चे गीतकार मंगेश कांगणे हे असून ए. व्ही. प्रफुल्लचंद्र यांनी ते संगीतबद्ध केले आहे. ‘सा रे ग म प’ फेम महागायिका उर्मिला धनगरचा वेगळ्या धाटणीचा ठसकेदार आवाजात ते प्रेक्षेकांना ऐकायला मिळणार आहे.