कलर्स मराठी ह्या वाहिनीवरील ‘तू माझा सांगाती’ या मालिकेत आत्तापर्यंत तुकोबांच्या घरातील, संसारातील विविध घटना आणि प्रसंगांचा वेध घेण्यात आला होता. मात्र विठ्ठलभक्तीत रममाण झालेले तुकोबा संतपदाला कसे पोहचणार आहेत, हे आता ‘तू माझा सांगाती’ मध्ये पाहता येणार आहे.

संतश्रेष्ठ तुकाराम हे केवळ वारकरी संप्रदायाचंच नाही, तर संपूर्ण महाराष्ट्राचं श्रद्धास्थान. ‘तू माझा सांगाती’ च्या रूपाने संत तुकारामांची जीवनगाथा प्रथमच मराठीत छोट्या पडद्यावर आणणारे; मालिकेचे निर्माते – दिग्दर्शक संगीत कुलकर्णी यांनी या मालिकेच्या निर्मिती मूल्यात कुठलीही तडजोड केली नसल्याचे सांगितले. तुकारामांची भूमिका साकारणाऱ्या चिन्मय मांडलेकरने तुकाराम म्हणून प्रेक्षकांच्या मनात घर केले आहे . सर्वांकडून त्याच्या अभिनयाचे कौतुक केले जात आहे. आपण आजवर तुकोबांचे निस्सीम विठ्ठल प्रेम अनुभवले, पण आता त्यांच्या अपार भक्तीचे दर्शन सबंध महाराष्ट्राला होणार आहे. कलर्स मराठी ह्या वाहिनीवर, सोमवार ते शनिवार संध्याकाळी ७.३० वा. ह्या मालिकेचे प्रसारण करण्यात येते.